26.5 C
Hakha
Monday, June 1, 2020

COVID-19 [Australia]: Centrelink bawmhnak, sok ningcang le a herhmi catlap cahnah hna

- Advertisement -

03 April 2020_ Nihin tiangah vawleipi huap in COVID-19 pulrai zawtnak nih a tlunh cangmi hna hi minung 1,018,948 hrawng an si i a thimi hi 53,179 hrawng an si cang. Cun, a dam than cangmi hna hi minung 212,072 tluk an si. Hi chungah a zawmi hi US in minung 245,175 leng an si i a thimi hi 6,059 leng an si i Italy in a zawmi minung 115,242 le a thimi 13,915 leng an si cang. A chang ah Spain in a zawmi 112,242 hrawng an si i a thimi 10,348 tluk an si cang tiah theih a si.

Nihin tiangah Australia ram chungah hi COVID-19 zawtnak ngeih le ngeih lo Test/Check cangmi hna hi 275,000 leng an si cang i hi chungah zawtnak a ngeimi 5,350 an si cang. Damh khawh cangmi hi 585 an si i a thimi hi 28 an si cang. New South Wales (minung 2,389) le Victoria (1,085) hi a zawmi an tam biknak pengkulh (state) an si.

CENTERLINK BAWMHNAK [$750] : One Off Economic Support Payment

Hi bawmhnak cu Australia cozah nih COVID-19 kong he pehtlai in a ramchung mi pumpak/chungkhar hna bawmhnak a pekmi phunkhat a si. Hi bawmhnak cu AUD$750 a si i a hmu dingmi minung 6.5 million hrawng cu an si lai.

Hi bawmhnak hi mizapi/pumpak mi zeipoah nih tinco dingmi a si lo; March 12 in 13 April 2020 karlak ah Centrelink in bawmhnak pakhatkhat a eimi hna lawng pek an si lai. Hi bawmhnak kong ah zeihmanh tuah a herh lo; 31 March in 17 April 2020 karlak hrawngah Automatic in a ngah dingmi pawl sinah a lut lai.

Hi bawmhnak a hmu dingmi hna cu Centrelink in Age Pension, Disability Support Pension, Carer Payment, Carer Allowance, Parenting Payment, Widow B Pension, Austudy, Bereavement Allowance, Newstart Allowance, JobSeeker Payment, Youth Allowance, Sickness Allowance, Widow Allowance, Family Tax Benefit A, Family Tax Benefit B, Pensioner Concession Card le adangdang bawmhnak pakhatkhat (Chinmi nih kan hmuhmi bawmhnak pawl deuh langhter a si) a eimi pawl an si lai.

Theih ding: A cunglei ah langhter a tam deuh bawmhnak pawl cu 20 March 2020 in cun JobSeeker Payment le adangdang aa tlakmi bawmhnak ah thial le thlen an si cang. Mahle dirhmun le hmuhmi bawmhnak cio hoih in zung leiah a herhmi tuah ding cu a phunphun in a um ve.

CENTRELINK BAWMHNAK: JobSeeker Payment

Hi bawmhnak cu COVID-19 ruangah rian phuah/dinhter chung a tongmi hna le rian a tuan rih lomi hna caah tuahmi bawmhnak a si. Hi bawmhnak hi zarh 1 ah $550 in zarh 2 dan ah $1100 tiang hmuh khawh a si. Sihmanhsehlaw, pumpak asiolah chungkhar dirhmun cio hngat in hmuhmi a zat cu a si te lai.

Hi bawmhnak cu MyGov online account a ngeimi hna nih cun ONLINE in sok khawh a si. Asilole, Centrelink ah JobSeeker Payment Claim Form hal in sok khawh a si.

Hi bawmhnak sok tikah a herh khomi catlap cahnah hna cu: TFN, na fale Birth Certificate le Nuleva Sinak Langhternak (Relationship Status Declaration- chungkhar ngeimi hna caah online in tuah khawh a si, form phit a hau lo), Bank statement or Account balance, inn hlannak biahren (Lease), Rian Dinhternak Ca (Employment Separation Certificate) ti bantuk pawl an si.

CENTRELINK BAWMHNAK: JobKeeper Payment

Hi bawmhnak cu thla 6 chung Australia ramchung mi 6.7 million hrawng riantuantu pawl nihlawh/thlahlawh peknak caah rianngeitu pawl bawmhchanhnak caah tuahmi a si. 30 March 2020 thawk in riantuantu pakhat hlawh peknak caah rianngeitu nih zarh 2 dan ah AUD$1,500 a sok khawh.

Nizaan Cawn Nithum tiangah hi bawmhnak sok a duhmi rianngeitu (businesses) pawl hi 270,000 leng an si cang. Hi bawmhnak cu kum 1 ah rianngeitu hna nih an turnover (tangka hmuhmi dihlak] $1 billion nak tlawm deuh va si sehlaw, 30% lengin (a tlawmbik thla 1 ah) a tum a si ahcun an sok khawh. Cun, an company or business hi Major Bank Levy (Commonwealth Bank, ANZ Bank, Westpac, National Australia Bank le Macquarie Bank ah ngunkhuai peknak)a ngei lomi an si lai.

Cun, riantuantu kha 01 March 2020 tiangah thla 12 leng riantuan cangmi a si lai, cun pehzulh in na (rianngeitu) sinah rian tuantermi a si lai. Kum 16 cung, Australia rammi le PR asiloah PSCV, SCV/SC (Subclass 444) Visa a ngeimi a si lai.

Hi bawmhnak kong he pehtlai in soknak cu thawk khawh a si rih lo. Zeihmanh tuah khawh rih a si lo, Australian Tax Office (ATO) sinah sok duhnak lawng kha chim/langh khawh a si rih. An sin minpeknak (register) na tuah hnu lawngah anmah nih thawng an in thanh te lai.

[Kan Chin miphun dirhmun hngat in a tawinak in tialmi a si caah fiang deuh in theih na duh ahcun pumpak in ka pehtlai te uh. A hnu deuh inn hlan man, inn cawmi pawl tangka cawi khawhnak le Superannuation laknak kong pawl ka rak tial than te lai.]

Cattialtu: Salai Robert Ngun Sang (Australia)

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...