Las Vegas, US — Laimi nih ‘Pakio’ tiah kan auhmi boxing minthang Manny Pacquiao nih tunai bakah Keith Thurman a tei.

Round 1 ah teng lak bakin a thongh. Round 12 an i phomh. A dongh tiang Pakio nih ‘fak deuh’ in voi tam deuh a thongh khawh.

Biakkhiaktu 3 lakah 2 nih “Pakio nih a tei” an ti caah Pakio tei in bia an khiah hi si.

Round 1 ah Pakio nih teng lakin a thongh

Biakhiaktu 3 nih an khiah ning cu;

  • Glenn Feldman nih 114-113 in Thurman nih a tei ati.
  • Dave Moretti nih 115-112 in Pakio nih a tei ati.
  • Tim Cheatham nih 115-112 in Pakio nih a tei, ati ve.

UK thawngzamhca The Guardian editors pawl nih “kanmah tuak ning zongah Pakio nih 115-112 in a tei” an ti ve.

Pakio nih a thi pawt dihlak in a thongh

An i thongh hlan ahcun kum 30 American pa Thurman nih “ka tei tuk lai, Round 1 ah puai piat (KO) in ka tei lai,” tiah a rak chim.

Pathian a ttihzah tukmi le mi toidor Pakio nih cun “ka upa cang nain kaa tthua kho rih ko dahkaw. Thurman a holh tam deuh paoh ahcun thongh lai kai ngaih deuh. A caan zat tikah tehte kan piahte hna lai” a rak ti bang in tehte a kan piah taktak.

A kum khua tuak ahcun Pakio cu boxing aa thong ding hmanh asi ti lo nain a tthawn tuk ruangah aa thong kho peng rih.

Pakio nih teinak kut a thlir, puai zohtu mipi lawmhnak in an dir i an kut an thlir ve

Kum 40 asi cang i December 17 ah 41 a tling cang ding Pakio cu Philippines Hlutdaw Sang MP a ttuan liomi zong asi.

Tuni an i phomhmi hi ‘WBA (Super) welterweight champion’ taisawm i cuh in an i phomhmi si. Pakio nih boxing ah tuanbia thar a ttial, ‘Welterweight champion ah a upa bikmi’ tiin a caam peng cang lai.

Teinak a hmuh cangka in “tu zaan cu Pathian nih thluachuah aa ka pek” tiin Pathian cungah aa lawmhnak a chim. — Boxing an i thonghnak US ram Las Vegas khua ahcun atu hi Zarhteni zaan asi.

Thurman cu boxing aa thonghka in a sung bal lomi, world champion pakhat a si nain Pakio nih a tuanbia a thlenpiak ai.

Pakio cu thlen ti pawt, taksa phing dihlak le thisen chuak tiangin boxing ah a hmuhmi tangka hi sifak bawmhnak caah a hman lengmang.

Thurman hrim nih amah kaa bakin ‘Pakio nih aa ka tei deuh ko’ ati

Puai dih hnu ah Thurman nih “Pakio cu a mak hrim ko, i phomh tthan ka duh” tiah a chim.

“Amah he kan i khingkhang deuhnak hnga rak cawl kho deuh ning law voi tam deuh kut tum rak thla ning ti ka va duh dah. Ka sining le kut tum ka thlak zat kha Pakio nakin ka der deuh hrim ko,” tiah a chimchap.

Pakio zong nih a tei ko nain a neek lo. “Thurman tthuat cu a fawi lo. Boxing thongh a thiam. A tthawng. Tu zaan cu Pathian nih thluachuah aa ka pek i si,” tiah Pakio nih toidor tein a chim.

Tangka zeizat dah an hmuh?

Anmah 2 thonghnak puai tuahtu Nevada State Athletic Commission nih, “Pakio nih a tlawmbik $10 million a hmuh lai i Thurman nih $2.5 million a hmuh lai,” tiah Ningani ah official in thawng a thanh.

“Nain, a zohtu minung an tam ahcun mah nak tam deuhpi an hmuh lai. Pakio nih $20 million leng a hmuh khawh i Thurman nih $8 million leng a hmuh khawh,” an ti.

Puai dih hnu atutiang ahcun zeizat sat dah an hmuh taktak ti an thanh rih lo. Nain, a tlawmbik Pakio nih $10 million le Thurman nih $2.5 million an hmuh ti cu a fiang.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.