CNLD nih teinak kan hmuh cun NLD nakin rian kan ttuan khawh deuh lai

Salai C Lian | Chin World — A ra laimi 2020 Thimnak ah Chin party nih teinak kan hmuh ahcun NLD cozah nakin 100 ah 100 rian kan ttuan kho deuh lai, tiah CNLD joint chairman Pu No Than Kap nih a chim.

“Chin mipi nih cun lam, hlei, mei le basic inn lawng an zoh. Mah tham cu zei party an kai paoh ah an tuah ding rian asi.

“Nain, kanmah nih cozah kan tlaih ahcun mah nakin a kau deuhmi hlathlainak kan tuah lai, a ram a daw taktakmi nih rian an ttuan cun zei tik hmanh ah ziknawh ei zong a um lai lo tiah ka ruah.

“Atu cu contractor pawl hmai khah lo phun in an um caah kan miphun le ram caah a herh taktakmi an ttuan ti hna lo,” tiah a chim.

“Kanmah nih cozah kan tlaih cun, sianginn ah kan ca le nunphung cawn khawh dingin kan tuah lai. Atu cu kan nunphung a tlau cang i midang nunphung nih a satthu. Tahchunak ah, pipu ro co, tbk., hna. Kan miphun caah upadi a um ti lo.

“Kannih Chin party cu mi ser ciami upadi ah um aa timmi kan si lo. Kan miphun le kan ram he aa tlakmi upadi kan ser lai, mah hi tlinter dingin ramkhel vawlei ah kan luhnak asi,” tiah a chimchap.

Chin Miphun Dimawkharesi Bu (CNLD) party cu atu hi Paletwa peng dah lo adang pengkip ah party signboard tar in zung an on cang. Chinmi tampi an umnak Sagaing le Magway ramtthen hna zong ah zung onnak an tuah.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.