CNF ralkap Lieutenant Sui Uk a nunnak liam

CNF ralkap Lieutenant Sui Uk cu tuzaan 8pm hrawngah kal damlonak in Hakha Sizung ah a nunnak liam.

Hakha sizung ah damlo ngai in a um lio ah a nupi cu Thantlang Sizung ah operation in fapa te a ngei ve. Nau a ngeihnak ni 3 lawng a si rih.

Senthang peng, Phaizawng khuami Sui Uk hi CNA ralkap bo 2 a si. Kachin state ah raltuk a cawngmi le CNA nih an bochan ngaimi a si.

Australia Chin ramkheltu Ram Tinthei nih atanglei bangin a ngaihchiatnak a ttial.

Ram Tinthei: Ka Kawi Lieutenant Sui Uk, 

Na nunnak dih tiang kan Chin Miphun Dohthlennak ah na sining dihlak na hman. Na biakam bang na nunnak a dihdongh tiang na tuan. Na liam siaherh hrim hlah mu, nan miphun hawi nih na keneh dawh kan pehzulh lai. “ Na dawt cikcekmi na miphun hawi kan hmailei kan caah, nihin na sining dihlak na hman, na nunnak a dih tiang na tuan. 

Lieutenant Sui Uk hi CNA ralkap bo 2 asi. Kachinram ah raltuk thiamnak a cawng i, ral zong biatak in a tumi pa raltha asi. Hibantuk thiamnak a ngeimi nih a kan liamtak cu kan miphun sunghnak taktak asi.

Nupi a ngei i a nupi fa a ngeihnak ni 3 lawng asi rih. Hibantukin a nunnak a liam ti thawng ka theih tik ah ka nun nih a celh hrim lo. Taantakmi chungkhar hna caah thlacam bawm cio hna usih. 

An sin ka phak ahhin mithmai panhte in a ka chawnhbiak. Zantim khuamang tiang meiphu toh in a thuthi, saduhthah bia aa ruah tawnmi kan si. Chin miphun caah a saduhthah a ngan hringhran nain, a saduhthah a tling manhlo. Facebook a thut caan ah ngawl hngal loin aa chawnbiami kan si. Saduhthah zaza aa ruahmi kan si.

Nikhat te caan um rih sehlaw, kuh in pasaltha na si tiin au hnawh ka duh. A ruak cung hmanh ah mithli tlaknak caan a umlo cu tuar a har hringhran ko. 

Rest In Peace !