29.1 C
Hakha
Tuesday, March 31, 2020
More

    Chinmi nih $60,000 Leng Australia Meikang Hartong caah an Hlut

    Ṭial Tharmi

    - Advertisement -

    Melbourne — Australia ram, Victoria state um Chin khrihfabu le community pawl nih an ram meikang hartong pawl caah $61,859 (Kawlram tangka ting 600) an hlut.

    An hlutmi tangka cu February 14 ahkhan Australia cozah meithat zung Country Fire Authority (CFA) sinah an pek.

    Australia ramlak ah meikang faktuk a chuah caah khua cheukhat le inn thong tampi ciam dihlak a kangh hna. Minung 25 leng a thah hna i thongsawm tampi an zaam. Saram 500 million leng an thi tiah an ruahdamh. An thawngpang nih vawleipi a hninh. Hartong pawl bawmhnak caah cozah le zatlang bu tampi nih mipi sinah bawmh an hal.

    Cu bantukin, Australia phan Chinmi hna zong nih an ti khawh tawk an bawmh ve hna hi asi.

    Australia Chin Community nih, “Victoria state hi fak bik a kanghmi si ve caah Victoria state um Chin community le khrihfabu pawl i bawm in zarh 8 chung kan member sinah bawmh kan hal i mah zat kan hlut khawh hna hi si,” tiah a thanh.

    A ra laimi March 13 zongah Myanmar Idol Season 4 winner Esther Dawt Chin Sung le pahnihnak Benjamin Sum cah in concert an tuah lai i hmuhmi tangka vialte meikang hartong pawl caah an hlut rih hna lai.

    Melbourne khua hrambunh Australia Chin Community nih, “state kip i Chinmi hna zong nih nan ti khawh tawk cio in meikang hartong bawm ve hna uh tiah kan in forhfial hna,” ati.

    Adelaide um Chinmi zong nih January thla ahkhan an khua cozah sinah meikang hartong bawmhnak tangka $8,000 an rak hlut. Cozah nih hartong pawl cu an herhmi cio i cawk kho dingin a tangka in a pek te hna lai.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.