China ah Laipa nih a hawi Laipa a thah

Dongguan City, China — China ram ah kuli rian a ttuanmi Lai pa Eng Muan nih a ttuan hawi Lai pa Ram Uk Cung a thah, tiah thawng kan theih.

Dongguan City um company pakhat ah rian a ttuan ttimi an si.

Thah a tongmi Ram Uk Cung hi kum 16 te lawng a si rih. Congthia khuami Pu Chan Thawn le Pi Hniang Sung hna i an fapa a si. Kalay, Tahan pawng i Phurmawi khua ah a peemmi an si.

Mi thattu pa Eng Muan hi kum 34 hrawng a si cang. Falam peng Ngawn leimi a si i Kalay, Tahan pawngte i Kermal Thlacamnak Asawng kainak lam pawng, Sai khua ah khuasami an si. Atu hi khuazei dah um ti hngalh asi rih lo.

Ram Uk Cung

Ram Uk Cung a upa Thawnga zong Dongguan City ah rian a ttuan ve nain an ttuannak aa khat lo. Thil sining cu Thawnga nih atanglei bangin a chim.

“April 20 zaan ah kanmah Laimi nih phone an ka chawnh i na naupa a thi an ka ti. Rian a ttuan hawi Chin pa pakhat nih a thah an ti.

“Ka naupa phone cu ka chawn kho ti lo. A rianttuan hawi phone number ka hlat i minung 3 ka chawnh hna.

“April 15 zaan ahkhan kan ttuannak company nih inn a kan pekmi ah beer kan ding hna. Minung 7 hrawng kan si. Bia kan i al hna. Deilei 2:30am hrawngah innleng varenda ah kan dir lio ah kan hawipa nih na naupa cu a hnulei in a hrom ah namte in a ah i a thi, an ti.

“A ruak cu company in meng 1 hrawng a hlatnak lamkam ah kan va chiah i palek nih an lak cang lai. Laimi minung 2 nih kan i zawn i kan va chiah.

“Atu hi kan dihlak in company in kan zaam i kan umnak hi khuazei zawn asi zong kan hngal lo.

“A thattu pa cu a min ah Eng Muan asi i kum 34 hrawng a si cang. Kawlram ahcun Kalay peng, Tahan pawngte i Kermal Thlacamnak Asawng kainak lam pawng, Sai khua ah a ummi si, an ti i a hmanthlak an ka kuat.

Eng Muan

“Ka naupa cu ngakchia te, kum 16 lawng a si rih. A ttuannak company ka theih lo caah a ruak zong ka va zoh kho lo. A hawile pawl cu ka hal peng hna nain an ka chim duh lo. ‘Nan ttuannak company min le hmanthlak tal ka kua uh’ ka ti hna zongah an ka chim duh lo.

“Ka boss pa zong bawmh ka hal nain ka naupa a ttuannak company kan hngalh lo caah kawlnak a hngal ve lo.

“Palek sin report ti ah le passport a ngei lomi, phungninglo in rian a ttuanmi lawngte kan si caah kanmah zong tlaih a tong dih ding kan si. Kan boss pa zong cu phungninglo ramdangmi rian a petu si ve caah palek sinah a report ngam ve lo. China ram i Kawlrammi paoh cu Kawl he Lai he phungninglo lawngte kan si.

“Kanmah cu Congthia khuami kan si nain Kawl lei ah kan pem i Tahan pawng, Phurmawi khua ah kan um.

“Atu hi ka naupa kong cu ka hlat peng ko nain ka hlat kho thlu rih lo. Aruak ka hmu kho te lai maw ti zong ka hngal lo. Ka ngaihchia tuk hringhran.

Eng Muan

“Ka naupa a ttuan hawi pawl cu phone chawnh khawh zong an si ti lo. An phone an thah dih cang. Hmasa kan i chawnh lio ah an pawngkam ah Laimi tampi aw ka theih. Nu aw zong ka theih.

“Nanmah nan umnak GPS location tal WeChat in ka kua ulaw ka naupa ruak cu ka boss he kan va lak lai, ka ti len hna zongah an ka kua duh lo. Thawngthanh lo awk a that lo caah an ka thanhmi khi si, mah pin cu zeihmanh an ka chim duh lo,” tiah a upa nih a chim.

Mi thattu Eng Muan hi Facebook account 2 a hmang, atanglei hi an si. A umnak hngalmi nih thawngthanh dingin kan in nawl hna.

Thawnga hi chungkhar le miphun a daw ngaimi le Pathian aa bochan tukmi a si. Atu bantukin vawlei cungah a fak bikmi ngaihchiatnak a ton lai a hngalh ve lo caah, nizaan Thawh Than Ni zong kha an khua Phurmawi ah caw le vok in a tuahpiak hna.

Hi bantuk thawngpang a theih tikah zaan hngilh kho lo le ngaihchia tukin a um. A naupa ruak a hmuh khawh fawn lo caah le kawlnak zong a hngalh lo caah awlokchong taktak in a um.

Bawmh halnak — Aruak tuan ah an hmuh khawhnak hnga Facebook ah SHARE kan bawm cio dingin kan in nawl hna. Website ah copy lo ding.

A ruak umnak a hngalmi nan um ahcun, +60 1111 300 411 asiloah email lian@thechinexpress.com ah thawngthanh dingin kan in nawl hna.

Tuan ah aruak an hmuh khawhnak hnga le tantakmi chungkhar caah thlacam bawm cio hna usih.