19.5 C
Hakha
Monday, November 29, 2021

Chin state khuate 5 in khuami 1,200 an zaam

Myanmar cozah ralkap nih March 14 le 15 ah a pehpeh in Chin state Paletwa peng khuate 5 cu vanlawng in a kah hna i khuami 21 leng a thah hna, 30 hrawng a hliamh hna i inn tampi a hrawhpiak hna caah minung 1,200 hrawng cu tuni March 16 ah Sami khua lei ah an zaam.

A zaammi Chin kan unau 1,200 hrawng riahnak ca, eidin le sii bawmh an herh tuk, tiah Khumi Media Group nih tuni ah a thanh.

March 14 zaanlei ah Paletwa peng Meesawa khuate 3 cu Myanmar cozah ralkap nih vanlawng in khoh 2 khelte a kah i Chinmi 12 a thah hna, adang 15 a hliamh hna, inn tampi a hrawhpiak hna.

March 15 zaanlei 4pm ah Paletwa peng Wetma le Pyinetin khuate 2 cu vanlawng in a kah ve hna i Chinmi 9 a thah hna, adang 13 a hliamh hna, inn tampi a hrawh piak hna.

Cucaah, khuate 5 Chin khuami hna cu an um ngam ti lo caah atu bantukin Sami khua lei ah nunnak kawl in an zaam hi si.

Kan unau Chinmi hna tuarnak a fah tuk ning hi ruah ah celh asi lo. An riahnak, eidin le sii cu ramchung ramleng Chin khrihfabu, pumpak le mirum pawl nih bawmh khawh cio i zuam hna usih.

March 8-11 ah Rakhine hriamtlai AA nih Paletwa pengum cozah ralkap an kah hna i 30 hrawng an thah hna, 20 an tlaih hna.

Mah ruangah atu bantukin cozah ralkap nih AA an um tiin a zumhmi Chin khuate pawl vanlawng in a kah thluahmah hna hi si.

Sualnak ngei lo khuami thih ding zong ruat loin duh paoh in a thah hna, a hliam hna i inn a hrawhpiak hna hi cu minung zong an lo lo.

Charhchan: Khumi Media Group

Malaysia
2,623,816
Mizaw Hmuhmi
Updated on November 29, 2021 1:29 pm
Malaysia
2,527,052
A Dammi
Updated on November 29, 2021 1:29 pm
Malaysia
30,309
A Thimi
Updated on November 29, 2021 1:29 pm
Malaysia
66,455
Zaw Liomi
Updated on November 29, 2021 1:29 pm

Ṭial Tharmi