Chin state ah um bal lomi Sports & PE (Science) School cu Hakha ah an sak lai

Chin state ah um bal lomi Sports & PE (Science) School cu Hakha ah an sak lai

Chin state ah a um bal lomi Sports & Physical Education (Science) School cu Hakha ah sak dingin April 29 ah Vice President nih innkil tung a bunhpiak cang hna. HBC Senior Pastor Rev. Dr. Stephen Lian Hup Ling nih thla a cam.

Sports & Physical Education (Science) School ah a kai ding siangngakchia pawl umnak inn telh in inn 4 an sak lai. 2018-2019 Tangka Kum chungah tangka 200 million kyats in an sak lai.

2019-2020 Tangka Kum ah tangka 195 million kyats in an sakremh chap rih lai. Thuya Lin Construction company le Triple 4 company nih an sak lai.

A hramthok ahcun zaanglek/sports phun 5 an chimhte hna lai. Chin state peng 9 um ngakchia vialte kai khawh dih a si lai i a zuammi Chin mino pawl zong Judo le Karate, Cantiang kah, tbk., cawn khawh a si lai.

Chin state in zaanglek minthang mino tampi an chuah khawhnak hnga zaanglek an zuammi lei ah tthangcho chin hna seh tiin Ngandamnak le Zaanglek Vuanci Zung tangum Physical Education (PE) Zung nih atu bantukin sak a timh hi si, tiah Chin state Zatlang Vuanci Pau Lun Min Thang nih a chim.

“Mikip nih zaanglek/sports tuah kho hna seh ti hi Ngandamnak le Zaanglek Vuanci Zung nih ai tinhmi a si. Cun, kan fale hna hi hmailei ah zaanglek minthang ah i chuah hna seh ti lungthlitum in Sports & Physical Education (Science) Sianginn an sak hi si.

“Zaanglek pakhat lawng si lai lo, sports he aa pehtlaimi technology kong zong cawn a si lai. Kan fale hna hi Asia ram vialte bawlung chuih le zaanglek dangdang zuamnak (SEA Games) ah pakhatnak laksawng tiang an hmuh ve nak ding ahcun Sports & Physical Education (Science) School hi a herh taktakmi si,” tiah a chim. Khonumthung Burmese

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.