Chin state ah $54 million in private company nih rian an ttuan lai

Chin state ah $54 million in rianttuan dingin company 4 nih an sok i Chin state cozah he nizaan ah hnatlaknak minsen an thut cang.

“Chin state ah rianttuan awk a um tiin company pawl sawmnak” cu nizaan le tihni kha Yangon ah an tuah.

Chin state ah rian ttuan dingin minsen a thut tu company 4 lakah a ngan bikmi cu Norway Power Company Ltd. a si. $50 million in Chin state ah electric a ser lai. Adang company 3 cu ramchung ta an si.

Chin State Investment le Company Rianttuannak Hruaitu (DICA) director U Min Zaw Oo nih, “Chin Taung Yadanar Co., nih $1 million lengin Chin state ah dum/lo cinthlaknak rian a ttuan lai, Khumi Institute company nih 3 billion kyats in khuapi inn a sak hna lai i KL Amazing Com. Ltd. nih 2.4 billion kyats in hotel a sak hna lai,” tiah a chim.

“Acunglei kan langhtermi rian pawl hi Chin state ah a herh bikmi an si caah usa kan pek bikmi an si. Mah rian a ttuantu company pawl cu kum 7 chung an hmuhmi tangka ngunkhuai (income tax) kan la hna lai lo,” tiah a chimchap.

Ni hnih chung Chin state ah rianttuan dingin company sawmnak an tuahmi cu Rampi Investment le Ramdang Chawleh Pehtlaihnak Vuanci U Thaung Tun le Vice President U Myint Swe zong nih an telpi hna.

Myanmar ram ah ramdang company nih rian an ttuan theng lo caah atu hi biatak tein an sawm hna lio a si.

Chin state cu horkuang le tlangsang a tam tuk ruangah lamsul le innlo ttha sak a har tuk i tthancho a nuar ngaingai. Ahlei in, a herh bikmi electric le lamsual hrimhrim a chia tuk i biatak tein ser an hau.

State cozah lutlai Salai Lian Luai nih, “usa kan pek bikmi cu hotel, khualtlawnnak, cinthlaknak, leitang chuak cawhnak, lamsul le mei hi an si,” tiah a chim.

Vice President U Myint Swe nih, “Chin state cu India le Kawlrawn karlak ah a um caah aa rem tuk. Kap 2 chawlehnak a karh thluahmah lai i company tampi nih an tangka in rianttuan an duh thluahmah ko lai. Lamsul, phone/internet, innlo, tbk., pawl tuah a duhmi company an karh thluahmah ko lai,” tiah a chim.

Ni 2 chung an meeting ahcun; Hakha, Falam, Tedim, Paletwa le Mindat peng hna ah khuapi ser rian a tampi nak kong, Falam, Hakha, Kanpetlet, Mindat le Paletwa hna ah cinthlaknak le thiamtah rian ttuan awk a tampi nak kong an ceih hna.

Khonumthung National Park, Rih Tidil, Kimo Wildlife Sanctuary, Seinmu National Park le Khuado Festival, tbk., hna ah khualtlawnnak tuah awk a tampi nak kong, le Manipur le Tedim peng i Lay Myo tiva le Bawinu tiva hna ah ti-electric le thli-electric tuah awk a ummi kong hna an ceih.

2020 ahcun Falam ah Surbung Airport zong an hun lai caah Chin state cu khualtlawng an karh deuh ngai lai i tangka lut a tam deuh ngai lai tiah zumh a si.

DICA nih, “nizaan le tihni i Chin state ah rianttuan dingin company sawmnak puai ahcun ramchung ramleng in company ngeitu minung 800 leng an kai kho,” tiah a chim.

“Mah lakah, US, Canada, China, India, Australia, France, Germany, Norway, Belgium, Israel le ASEAN ram pawl in mirum 130 an i tel. Brunei le Vietnam company lutlai pawl zong an i tel. A tambik cu China le Thailand company ngeitu pawl an si hna,” tiah a chimchap.

February ahkhan, “Rakhine state ah rianttuan awk a um tiin company pawl sawmnak” cu Ngapali rili kam ah an rak tuah ve i rian ttuan awk a ummi phun 6 an rak chimh hna. Ramchung ramleng company 28 nih $4.9 billion in hotel le khualtlawnnak tuah dingin an sok i Rakhine cozah he minsen an thut.

Milu tlawmnak le Myanmar ram chung i sifak tam cemnak Chin state ahcun rianttuan a duhmi company an tlawm ngaingai ti a lang.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.