Canada awttha Celine Dion cu a der tuk caah mipi khuaruah har in a chiah hna. Nain, Celine Dion nih cun ka dam ko, kaa der termi a si a ti.

Naite ahkhan Celine Dion nih Paris Fashion Week puai a zawhnak hmanthlak pawl Instagram ah a tar hna i internet hmangtu mipi cu an lungtling lo ngai.

“A dertuk luakchuak. A der hnu hmanthlak tampi ka hmuh cang i, zoh dawh der si lo” tiah online hmangtu pakhat nih a ti. Nain, amah Celine Dion a uartu mipi nih cun zeitluk a der zongah ‘amak tuk’ an tti tthiam ko.

Celine Dion (kum 51) nih April thla ahkhan “voi dangnak in ka der deuh tak ko. Kaa der termi a si. Ka ngandam ko” tiah ABC News ah a chim.

“Ka der nak hnga caah zarh khat ah voi 4 ka tuah. Der nak dingah fak pi in kaa zuam. Der hi ka duhmi a si,” tiah Celine Dion nih People magazine ah a chim fawn.

“Ka der ahhin ka tthawng deuh, kaa dawh deuh tiin kaa ruah. Ka upa deuhdeuh ka tthawng deuhdeuh tiin kaa ruah,” tiah a chim fawn.

Celine Dion cu a der tukmi ruangah a soiseltu an tamtuk i a um sawhsawh kho ti lo, a phomh bak ve hna.

“Hna ka hnawh hlah uh, ka chim huam lo. Ka der nan uar lo ahcun hman ka thla hlah ko ngat uh. Nan duh cun ka ra lai, nan duh lo sile hna ka hnawh hlah uh,” tiah a phomh hna.