July 12 zaan ah Myanmar MMA fighter Bozhena Antoniyar le Vietnam-American MMA fighter Bi Nguyen cu Malaysia ram ah an i phomh i Antoniyar nih a tei.

“A hmasabik ah a ka sertu Pathiang cungah kaa lawm tuk. Cun, a ka cawnpiaktu Bali MMA Team cungah kaa lawm tuk. Thazaang a ka pe i thla a ka campiaktu mipi nan dihlak cungah kaa lawm tuk. Sponsor a ka petu nan dihlak cungah kaa lawm tuk,” tiah teinak a hmutu Bozhena Antoniyar nih a Facebook cahmai ah a lunglawmhnak a langhter.

Bozhena Antoniyar (kum 24) le Bi Nguyen (kum 29) cu ‘ONE: MASTER OF DESTINY’ tlangtar tangah an i tthua i round 3 nak ah Antoniyar nih a tei fangfang te a si.

Antoniyar le Nguyen cu minutes 15 an i phomh hnu ah One Championship i biakhiaktu 3 nih bia an khiah. Nguyen duhtu 1 le Antoniyar duhtu 2 an si caah Antoniyar nih teinak a co hi a si.

Caantlaitu nih teitu a thanh lio ahhin Bi Nguyen nih amah bak ah aa ruah i nuam tak in a kut thlir. Dailuci pa zong nih Bi Nguyen a kut thlir nain teitu taktak cu Antoniyar a si.

Bozhena Antoniyar cu Myanmar ram, Kayah state i Loikaw khuapi ah a tthanglianmi a si. Kum 16 a si lio in boxing a cawngmi a si. Atu hi One Championship ah voi 3 aa thua cang i voi 2 teinak a hmu.