Disney le Marvel chuahmi ‘Avengers: Endgame’ movie nih tangka $2.289 billion a hmuh cang. ‘Avatar’ movie lonh in vawlei cung movie vialte lak ah tangka tambik a hmumi a hung si.

“Avengers: Endgame movie cu cinema zungpi ah kan piahnak zarh 13 a si cang i Zarhpini hin cun a zate a lutmi $2.789 billion si cang lai, Avatar movie a tei cang” tiah Walt Disney company nih zahan ah thawng a thanh.

‘Avengers: Endgame’ movie cu April 24, 2019 in khan cinema zungpi ah piah hram an rak thok i zarh 2 chung lawng hmanh ah $2.19 billion leng a rak hmu.

“Marvel Studios le Walt Disney Studios teams kan in lawmhpi hna. Cun, Avenger: Endgame nih tuanbia thar ttial kho dingin thazaang a kan vawlei cung hmun zakip um mipi nan dihlak cungah kan i lawm,” tiah Walt Disney Studios cathluan a chuah.

A hlan ah vawlei cung movie ah tangka lut tambik a hmutu pakhatnak hi ‘Avatar’ a si. $2.788 billion bak a hmu. Atu ahcun pahnihnak a tlaih.

Avengers: Endgame movie ahhin Robert Downey Jr., Chris Evans, Mark Ruffalo, Chris Hemsworth, Scarlett Johansson, Bradley Cooper le Josh Brolin hna biapi in lem an cang.

Avatar movie tuahtu James Cameron nih Avatar 2, 3 le 4 chuah a timh. 2021 in a thok lai.