Malaysia kan um lio ah Australia kal cu kan duh dih. Asinain, UNHCR nih Australia Cozah cu minung tlawm te lawng a lak. Mah hmanh cu nu pawl a case strong tak mi le unau um cia deuh lawng a lak an ti tikah Chin mi ca cun duh le duh lo zongah US ah choi dih a si.

Malaysia ralzam community ah CRC cu Australian High Commission he tha tein peihtleihnak a ngeih caah Australia kal ding paoh cu CRC ah form phih, an case tial piak le timhtuah piak dih a si. Cucaah, June, 2011 tiang ah hin kumkhat ah case or cap in tuak ahcun minung tlawm taktak te lawng an kal kho. Case 200 tluk chung ah Chin mi lawng te an si rih lo. Miphun dang tampi an i tal rih nain 85% – 90% cu Chin kan si.

Asinain, Australia ram ah phungningloin tilawng (boat) a phanh mi ruangah ramchung ramkhel (politics) a buai tuk i uktu party (ruling party) a si mi Labor caah thin a phang mi dirhmun in an um caah a rannak le a thli tein Malaysian Swap Deal (MSD) an tuah colh.

Vanchiat lak vanthat ah, tilawng in a phan mi pawl hi Muslim an tam caah Malaysia ah Chin ralzam Khrihfa a si mi kha dengto in Canberra biaruahnak ah lak ding in Cabinet meeting (a thlithup biaruahnak) ah bia an chah. Cucang ka te cun, Malaysia UNHCR kha an chonh hna i funding ceih lak an chap pin hna ah Chin Khrihfa pawl kha kan lak hna lai an ti.

Mah lio ah Australia Prime Minister cu Julia Gillard a si. Australia tuanbia ah a voikhatnak bik nu nih Prime Ministership a tleih a si ve.

UNHCR nih CRC upa an kan ton i Australia Cozah nih Chin mi tampi lak an in timh hna an kan ti colh. Mah cu zei tin dah a si khawh kan ti tik hna ah UNHCR nih tam an chim ngam lo.

Australia Cozah lei nan zung ah an ra te ko lai an ti. Australia Cozah nawl ngei tu he atu lio Prime Minister a tlai rih mi Scott Morrison zong a rak ra. Shadow Minister for Immigration a tleih lio a si. Mah lio te hin Aussie journalists pawl nih Scott Morrison hi mipem a rem lo mi a si tiin ceih lak a kan chimh cang. Asinain, journalist a kan chimh nak in cun a pumpak le a cawlcangh ning zoh ah a let in a tha. A thang an chiat deuh vak.

Rianrang taktak in 2011 September thla bak in RST (Resettlement Interview) ah Chin mi paoh nih unau chungkhat address a pe kho paoh Australia High Commission ah a kan kuat thluah mah. A tom tom bak in a kan kuat.

CRC kam busy ning hi chim khawh ding a si lo. Australia Cozah nih UNHCR zong $2 million a pek chap beh rih. Kumchiar te $8,79000 a bomh peng mi in $2 million a chap. UNHCR zong nih staff ceih lak a lak chap ve colh.

Australia ram cu boat kong an buai culh le Liberal party nih Labor dennak ah caantha a hmuh mi ramkhel kuat (political tactic) a si ve caah a den chih lawng siloin Australia ram ah a sangbik mi nawlngeihnak biaceih zung Supreme High Court an phan. Cu kar lak ahcun Chin mi cu tam tuk kan phan manh.

(Mah laknak ah hin keimah zong kaa tel ve)

Supreme High Court ah Malaysian Swap Deal cu an sungh pin ah le Liberal le Nationals nih September, 2013 thimnak ah teinak an hmuh caah Labor cu an sung. Asinain, Chin mi cu a thong thong in a kan lak manh.

Labor party nih tuzarh Nirukni ah teinak ka hmuh ahcun 202 auhnak zong direct in cap 4,000 ka chap lai a ti. South East Asia bawmhnak ah $4 billions an cik mi zong kan remh lai a ti. Mah ah hin, Myanmar caah $50-75 million kar lak bomhnak ai tal chih. Scholarship program zong ka chap chih rih lai a ti. An tuah colh hrim hrim lai.

Labor ka tanh. Aruang, mipem cungah dawtnak an ngei. An policy paoh paoh ka uar thlu le ka rem thlu ti a si lo. Minung pakhat ka sinak in mi cungah dawtnak a ngei mi le mipem mi harsa cungah dawtnak a ngei mi cu tanh lo awk an tha lo. Liberals cu UNHCR hmanh nih a huat tuk hna. Geneva meeting ka kai lio zongah Australia Cozah tuahsernak cungah an lungtlin lonak fak piin an langhter.

_ Cattialtu: Sang Hre (Australia)

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.