Australia PM Morrison party nih an tei caah Chinmi kan i lawmhnak aruang

Australia PM Morrison party nih an tei caah Chinmi kan i lawmhnak aruang

Canberra — Zahan May 18 thimnak ah atu lio cozah tlaitu Liberal le a ttantti party pawl nih teinak an hmuh tthan caah ramkip Chin hruaitu tampi an i lawm.

Atanglei ah an i lawmhnak aruang an ttialmi rel khawh si.

Myanmar ram in CHRO hruaitu Salai Bawi Lian Mang: Prime Minister Morisson le Liberal cozah nih vawlei cung ralzam pawl caah Australia cozah nih zawnruahnak in an tuahmi 202 Global humanitarian visa tiah an timi cu a dihlak in Chinmi caah an kan chiahpiak.

Ram pakhat nih miphun pakhat kha a minthlir in nanmah kha papek/usapek in kan in zohkhenh kan in lak hna lai ti cu a sunglawi ngaingaimi asi.

Liberal party in MP/Senator Dean Smith (Malaysia a ra lai i Chinmi le UNHCR a kan ton tthan lai, Kawlram ah a lante lai), Pu Renny Ceu Lian Mang, Salai Bawi Lian Mang, Prime Minister Scott Morrison, Pastor Ca Lian Thang, Niung Hlawnching le Sang Hnin Lian — UNHCR nih Chin ralzaam hlawt viar dingin bia a rak khiah ruangah MP Dean Smith hruainak in CHRO le Australia Chin upa nih Australia khualipi Canberra ah Prime Minister Scott Morrison an ton lio asi

Liberal cozah hi cabinet level ah Australia cozah nih Burma ah education le poverty reduction ca i kumchiar 80 Million hrawng nan bawmhmi cu Chin State ah rak kan ruah piak u tiah kan chimh cangmi hna an si. Hmai lei ah bia kan iruah lengmang lai tiah an kan ti caah an mah cozah an hmunh mi hi kan caah a biapi ngaingai mi asi.

Australia ram in Chin Charity Inc. hruaitu Pu Renny Ceu Lian Mang: Prime Minister Scott Morrison cu Khrifa zumtu tha asi caah Bawipa nih Australia ram hruai tu ding ah nawl a pek tthan

Prime Minister Scott Morrison le Pu Renny Ceu Lian Mang, hnu deuh khi Isaac Steward (Liberal party) si. Hnulei i Chinmi vialte khi Liberal party a vote mi lawngte an si — Prime Minister Scott Morrison le Isaac Steward nih Perth khuapi um Chinmi pawl an ton hna lio

Chin miphun nih thla nan kan campiaknak le nan kan bomhnak cung ah ka lawm tuk, CHRO le ACF upa pawl hna he Chin miphun caah biatak tein rian tuannak kan thawk tthan cawlh lai, tiah Senator Dean Smith nih a chimh rih…

Perth khua in Chin miphun nih kan ttanpi mi Isaac Stewart, Liberal for Cowan le Labor party in Anne Aly cu me 1% lawng in an i tei caah, an me thlak mi vial te cu zoh fel nak an tuah than lai, thlacamnak in rak bawm cio hna usih. 

Australia ram Brisbane khuapi in Niung Hlawnching: Chinmi a kan dawtu party nih teinak an co ca ah kan rak i lawm cio.

UNHCR nih Chin ralzaam hlawt a rak timh caah CHRO le Australia Chin upa nih Australia cozah lutlai Prime Minister Scott Morrison an ton lio

India le Malaysia um mi refugee pawl cu nan ha rak i ta ko uh. Chin mi cu papek nan si lai tiah bia a kan kamh bak cu mu. CHRO le Australia Chin community upa caah thlacam rak i zuam uh.

Ka u Di Di pa@ Renny Ceu L Mang nih a kan hruai tthan lai i, Canberra ah lomhnak bia chim ah kal tthan kan hau lai.

Australia cozah pi nih kan zawn ruat ding in Chin mi a kan dawtu Senator Dean Smith cung ah kan i lawm fawn. Tikir khua mi nih lai keuku (tithawl) nan pek mi zong parliament house a zung chung ah a chiah ko khah.

Asinain, Australia cu direct in PM thim asi lo caah mah le umnak MP kha an biapi tuk ve. Kannih umnak Rankin hi Labor cahtuknak asi bang kan hawittha Labor Jim Chalmers kan vote ko khah.

Australia ram in Lian Ding Hmung: Coalition Cozah (Scott Morrison party Liberal le an ttanti party pawl) nih Chin Communities Pawl An Kan Bawmhnak

Lian Ding Hmung (necktie nak le Lai coat sen) telh in Australia Chin hruaitu hna nih Department of Home Affairs (Lahwahkah, Refugee, Citizen, Palek, tbk., vialte a uktu) vuanci Petter Dutton, Liberal party (necktie sen) an ton lio. Petter Dutton zong nizaan ah MP a ngah tthan.
  • Maroondah City Council he i bawm in Chin Community of Victoria pawl zung khan an pek hna.
  • Maroondah City Council he i bawm in Nichuah um Chin Communities pawl le Karen pawl hman ding ah Burmese Community Center sak an timh.
  • Naite ah PM Scot Morrison nih WA Chin biakinn caah Australia dollar ting 4 a bawmh hna.
  • Senator Dean Smith nih UNHCH nih Chin ralzaam hlawtnak an tuahmi let tthan ding ah biatak tein a ttuan i, hlawh zong a tling (Mi dang zong an i tel).
  • David Hodget nih Chin Hakha VCE hmuh nakding ah a kan bawmh.
  • Michael Sukkar nih VCBC saknak hmuh khawh nakding ah a kan bawmh.
  • Amah thiamthin nih Hakha mincimh lioah Australia cozah sinah biatak tein Chinram bawmh ding ah a chim.
  • Chin upa hna nih Australia Prime Ministers hna Ministers hna ton khawh ding in Liberal MPs hna nih an kan tawlrelpiak.
  • Australia cozah nih Chin ralzaam tampi lak rih ding in an kan chimpiak. Kan i lak rih hna lai an ti fawn.

Puai kan tuahnak kip ah an kan telpi le kan herhmi kan chimmi paoh ah an kan bawmh kha cu, anmah rian ah chia ko usih.

(ACC Office le hmunhma hman ding an kan pekmi tu cu Maroondah City Council kutneh a si caah kan rak telh lo).

Hi vialte bawmh hi, Chinmi bantuk mi tlawmte caah cun bawmh taktak dawh a si.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.