Australia pa nih Dawt Hlei Tlem te chungkhar lak a timh hna

Malaysia — Australia ram, Adelaide khuapi ah a ummi Mirang pa David King cu awttha Dawt Hlei Tlem @Dawtmi le a chungkhar tong dingin nizaan April 18 ah Kuala Lumpur a rung phan.

Mah kong he pehtlai in Dawtmi anu cu The Chin Express nih phone kan chawnh, “nan chungkhar in Australia ah kan lak hna lai a kan ti i a herhmi tampi a tuah cang, kanmah minthut a herh caah atu hi Malaysia a ratnak si,” tiah a chim.

“Tangka in lak si loin, 202 visa (842 form) in lak a kan timh. Mah kong he pehtlai in April 18 kha UNHCR nih a kan auh. UNHCR officer nu nih, Australia rammi Mirang nih Chin ralzaam lak cu atu hi avoi 1nk si caah kan lau tuk, ati.

“Thloh kan duh hna caah kan auhmi hna si lo. UNHCR minung, kan minung nan si caah him te le tluang tein nan kal khawhnak hnga bawmh dingin kan auhmi hna asi. David King hi mittha le mifel a si/lo ttha tein kan hlat dih hmasa lai, ttha tein ttuanvo an la tak hna lai maw ti kan hlat dih hmasa lai, kan si khawh chungin kan in bawmh hna lai, a kan ti. David King he kan i theih ning pawl a kan hal.

“842 form cu thazing hrawngah kan phit lai i min kan thut lai. Mirang pa David King cu Nikhatni khi a kir ding si. A kir tikah kan form phitmi cu aa phorh lai i Australia cozah zung ah a ap te lai.

“Ramdangmi pi a si tikah UNHCR, Australia Tanzung le Malaysia Lahwahkah, Malaysia Tuluk Khrihfa pawl zong kan kongah an i ralring ngai. Atu hi kan umnak paoh GPS location a kan zoh peng, a kan ven kan ti lai cu.

“Thaizing zingka hi Malaysia Lahwahkah/Immigration ah interview a kan tuah tthan lai.

“Australia kan phan kho tak lai maw, a tluang lai maw.. timi cu Pathian thawng a si ko. A herhmi paoh cu kan tuah pah dih ko cang,” tiah Dawtmi anu nih a chim.

Mirang pa nih a theih hna ning

Dawtmi nih Mirang Pathian hla “Because He Lives” a cover mi cu ni kum ah Friends of Jesus timi Facebook page nih an post i 7.4 million times zoh a tong. Video cu Lai Kam Thang tuahmi asi.

Adelaide khuapi ah a ummi David King nih a rak hmuh ve. “A aw ttha tuk hita, khuazei rammi dah si…” tiin a comment hnu ah a konglam an chimh i aa theimi an si. Facebook in thla tlawmpal chung an i pehtlai hna hnu ah “UNHCR policy ruangah ram thumnak a kal kho lo ding an simi” a theih hna i lak a timh hna hi si.

David King konglam

David King hi Facebook ah a hmanmi min a si i a hmatpungttin (ID) min taktak a si lo, nain a min taktak cu zapi hmuh in langhter a duh lo caah kan in pe kho hna lai lo, tiah Malaysia um Chin Ralzaam Bu upa pakhat nih The Chin Express sinah a chim.

“Dawtmi lawng si loin Tedim nu ngakchia 2; Esther Cing Lun Mang le Ruth Muan Nu zong Facebook in a rak chawnh hna i nan chungkhar in Australia ah kan lak hna lai, a rak ti hna.

“UNHCR nih Chin ralzaam hlawtnak policy let seh tiin Chin Up project kan tuahmi video ahkhan Esther Cing Lun Mang le Ruth Muan Nu cu bia kan chimter ve hna i mah cu a rak hmuh tikah Facebook ah a kawl hna i a pehtlaihmi hna si.

“Cun, Kipte zong a pehtlaih. Chin nu 4 a pehtlaih hna kan ti lai cu. Pa an i tel lo.

“Thla 3 chung hrawng a rak chawnh hna hnu ah kan theih. Malaysia a ra lai ti zong kan theih caah ralrin ah Malaysia Immigration Zung ah ‘ttha tein kan check piak uh’ tiin thawng kan thanh cia.

“KLIA 1 airport hi 2pm ah a phan nain Immigration nih sau lakte an check i bia an hal caah 5:45pm lawngah a rung chuak kho.

“Chin ralzaam bawmh a duh taktakmi mittha a si/lo, hnu ah Chinmi a hrawktu a si sual lai maw, tbk., ralring tein UNHCR, Immigration le Chin ralzaam a kan bawmtu Malaysia Tuluk Khrihfabu pawl he kan hlat liopi a si.

“Chin nu ngakchia 4 zong cu thaizing hi Malaysia cozah he aa bawmmi ngakchia vennak zung Children’s Interview Center ah kan kalpi hna lai i thil sining an hal hna lai.

“Zei dang khi si lo. Theih bal lomi minung nih atu bantukin Chin ngakchia nu lawngte 4 lak a timh hna tikah kan i ralrin tuk bia khi si.

“Tangka in lak cu asi lo. Chungkhat le hawikom i laknak 842 form in free in lak a timhmi hna si. An ngah lai/lo cu Australia Home Affairs nawl si kaw chim khawh si lo.

“David King hi nupi le fa a ngei vemi cu a si. Seventh-day Adventist Church a si. A tthat tuk bia le dawtnak a ngeih tuk zong a si taktak kho ko, mittha si hraam seh ti hi kan thlacamnak a si,” tiah a chimchap.

The Chin Express: Dawtmi te chungkhar le adang pawl zong Pathian nih lam hruai hna in tluang tein Australia phak ter ko hna seh.

Theihternak: Website ah copy lo ding. Mah pumpak Facebook lawngah SHARE a ngah.