15.1 C
Hakha
Wednesday, September 30, 2020

Australia nih “Biakinn, Gym, Cinema” khar dih uh tiin nawl chuah

- Advertisement -

Melbourne — Australia ram ah coronavirus zawtnak ngeimi an karh chin lengmang caah ram hruaitu Prime Minister Pu Scott Morrison (hmanthlak) nih, “Nikhatni (March 23) thokin biakinn, pubs, clubs le gyms vialte khar dih uh” tiin thawng a thanh.

Australia Chin khrihfabu pawl zong nih kan biakinn, ṭhitum puai, chiat/ṭhat ṭhutpi, hla cawn, meeting, tbk., kan khar chung a hau ve cang lai tinak asi, a khar cangmi zong kan tampi.

Australia ah coronavirus zawtnak ngeimi 1,600 leng le a thimi 7 an si cang. Australia Chinmi tambiknak Victoria state le New South Wales state ah a zawmi an tam cem.

“Rianṭuan khawh in pub ah kal um ti lai lo, zingka ah gym ah kal um ti lai lo, rawldawr (restaurant/cafe) ah ṭhut um ti lai lo,” tiin tuni ah PM Pu Scott Morrison nih a thanh.

“Tu kum hi kan nun chungah a har bik kum asi. Thla 6 tiang khar an si khawh men caah mipi timhcia tein um uh,” ati.

Zarhpini zongah Pu Scott Morrison nih, “inn chung zaanglek/sport puai vialte zong Nikhatni chun hnu thok in khar dih an si cang lai,” ati.

Kaanche (beach) ah minung an tamtuk caah coronavirus zawtnak an i chawn dih sual lai tiin khua cozah pawl nih kaanche zong an khar thluahmah hna.

Restaurant/cafe pawl ah ṭhut in ei a ngah ti lo, cawk in kalpi (takeaway) lawng ngah cang.

Supermarkets, pharmacies, freight le retail pawl cu on peng an si ko lai.

Australia cozah nih “coronavirus nan i chawnhnak hnga lo (a karhnak hnga lo) minung i bu hlah uh…” tiin thawng a thanhmi cu mi tampi nih an zulh duh lo caah atu bantukin minung tamnak hmun vialte khar dih uh tiin nawl a chuah hi si.

Victoria state cozah hruaitu Pu Daniel Andrews nih tuni ah, “Nihnihni thokin sianginn khar dih an si cang lai, online in cacawn dingin timhtuah asi,” tiah thawng a thanh ve.

“Mipi nih cozah nawl chuahmi hi zei an rel lo i punghman in an um peng le mah zawn lawng an i ruah peng ahcun mi tampi an thi lai,” tiah a chim.

Victoria state cozah nih nawl chuahmi cu mipi zulhter hna dingin khua chungah palek 500 a thlah hna lai i khar uh timi vialte an kharter dih hna lai. Minung aa bumi paoh an ṭhek hna lai.

New South Wales state balte ahcun sianginn cu an on rih ko hna lai nain, fale sianginn kaiter/lo cu nulepa nawl asi, tiah state cozah nih a thanh ve.

Chinmi tampi kan umnak WA, SA le Queensland states pawl zongah sianginn cu an khar rih hna lo nain upadi kan dorh caah fale sianginn kaiter/lo cu nulepa nawl asi, tiin state cozah nih thawng an thanh cio.

Charhchan: ABC News, The Guardian, 9News

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...