29.1 C
Hakha
Tuesday, March 31, 2020
More

    Australia Chinmi nih $120,000 Leng an Ram Meikang Hartong caah an Hlut

    Ṭial Tharmi

    - Advertisement -

    Australia phan Chinmi hna nih an ram meikang hartong bawmhnak caah $120,000 (Kawlram ting 1,100 leng) an hlut.

    Melbourne khua um Chinmi nih “Victoria Chin Bushfire Appeal (VCBA)” tiin Australia meikang hartong bawmhnak caah committee an dirh.

    Salai Robert Ngun Sang (Secretary of VCBA) nih, “Melbourne um Chin khrihfabu le pumpak nih kan sinah bawmhnak an pekmi dihlak hi $70,748 asi,” tiah a chim.

    $61,859 cu Country Fire Authority (CFA) sinah cheque in an pek. A tangmi cu online donation asi i direct in CFA sinah a lut cang.

    “February 14 ahkhan Chin upa 8 nih Country Fire Authority zungah bawmhnak cu kan va pek hna. Zung rianṭuan vialte nih mithmai panh le lunglawm tein a kan don i lunglawmhnak bia tampi an chim. Chinmi nih kan umnak ram caah hi bantuk thilṭha kan tuah khawh cu Chin miphun ka si ka lawm tuk,” tiah a chim.

    Perth khua um Chin khrihfabu 7 i funtomnak bu Perth Chin Christian Fellowship zong nih Victoria le New South Wales states meikang hartong pawl caah tiin $32,600 cu January 23 ahkhan an rak hlut ve.

    Perth khua um Chin khrihfabu 7 nih $32,600 an hlut lio

    Adelaide um Chinmi zong nih January 19 ah $8,000 an rak hlut ve.

    Salai Robert Ngun Sang nih, “Chin Churches Council of Australia (CCCA) zong nih bawmhnak an khomh liopi asi i atutiang ah $20,000 leng an hmuh cang, hnu ah nawlngeitu sinah an ap ve te lai,” tiah a chim.

    “Kanmah zong nih Myanmar Idol winner Esther Dawt Chin Sung le Benjamin Sum cah in March 13 ah Melbourne ah meikang hartong bawmhnak concert kan tuah lai i kan hlut ṭhan te hna lai.

    “Cun, Melbourne um Chin business owners pawl zong nih adang tein $4,700 an hlut cang.

    “Chin khrihfabu cheukhat cu Baptist Union ah a pemi zong an um, zeizat an pek ti balte cu fiangin kan thei kho rih lo,” ati.

    Adelaide Chinmi nih $8,000 an hlut lio

    Australia rampumpi ramlak ah mei a kang i inn, sianginn, zung, tbk., 5,900 leng ciam dihlak in a kangh hna. Minung thong tampi inn an ngei ti lo. Minung 34 leng a thah hna, adang thongsawm tampi dinti, mei le ei awk kongah harnak an tong. Saram 500 million leng a thah hna.

    Meithatnak mawtaw, helicopter le vanlawng tampi in chun zan hlan in mei an that. Tangka million tampi an dih. A kanghmi hmun hi 72,000 square miles a kau. An thawngpang nih vawleipi a hninh.

    An ram mirum pawl, khrihfabu le pumpak tampi nih hartong le meithat pawl caah bawmhnak an pek cio. Australia Red Cross sin zongah $140 million leng an hlut cang. Cu bantukin Australia phan Chin khrihfabu le mipi zong nih an ti khawh tawk an hlut ve hna hi si.

    Kan phaknak ram caah phorhrit si loin santlai si i zuam cio hna usih.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.