19.1 C
Hakha
Tuesday, June 15, 2021

Atu Zûmtu & ‘Bîk Pali’

Atu kan vawlei cân sual chûm mui chungah hin tam deuh cu kan pil. Lai kan nawng lo, kan fir lo nain chunglei sual nih a kan pialpi cang. Aruang a um.

Aruang cu vawlei kha kan kut cung thil zohin kan zoh khawh tikah ai dawhnak, a fîmnak, a rumnak le a nuamhnak kha mit ah a tâng — kan pi hlun Eve mit kha a si.

Kan zoh i kan hmuh taktakmi cu vawlei chan ah ‘dawh bîk,’ ‘fîm bîk,’ ‘rum bîk’ le ‘nuam bîk’ chan kha si —BÎK PALI ai ton chan bik a si.

Bik Pali hi chunzan in kan ruat, a zûn in kan zaw. Kan mawh lo teh, minung pei kan si cu ti phot ning mu.

‘Bîk Pali’ um cân poh ah vawlei hi Pathian nih a ṭawl peng. Aruang cu Bîk Pali nih hin sual bîk a hrin ve caah a si. Bik Pali hi zûmtu kan râl ngan bîk a si.

A si cun Pathian nih vawlei hi a ṭawl cang lai tinak si ko cuh ti in a dih lo teh. A vêl kong kha zoh ta sih.

Pathian vêl nih vawlei hi a tlaih cân [vêl ngeihnak cân] a si tak ko. Mah cu phei thluan thlurh in ṭhutpi ding maw, lâmpiak awk dah?!

A vêl hi zawng zang tlaih in zûmtu nih kan i tlaih awk si lo. Zûmtu nun ah daithlân le thathûtnak si. A vêl nih a kan tlaih chan mission ah a kan daithlânter. Hnangam-thathû in a kan umter.

Cu lawng hlah e, a vêl cu a lianngan; a sâng tuk hringhran i aw, ra loin a um hoi ko la. Duhsah in thlen cân, ṭuan cân cu a umte ko lai ti khi kan ruahnak ah a riak.

“Te-ko-lai” nih nuncan ziaza ṭha lei a panh lo; khat-hnih-thum ah a thi khomi hi dah ngai, hnangam ngang in a kan umter khawh rih. Nan thinphâng seh tinak cu si lo cuh, sahngar hliamhcia arpi kong si lo. Nuncan ziaza kong chim poh i, tlau i timh peng kong si lo.

Zungzal lan in a tlau ti lo dingmi atu zûmtu kan vawlei cân le rian kong a si.

Hnangam zong hi sual ka phawt bia si lo; zûmtu cu a hna a ngam awk si — hnangam-daithlân khi pei ka ti cu. Capo le biatak ai dang i, capo-biatak khi phundang si ve.

Tangah a bokmi rilipi tî khi hung kai vurmar in, tla ṭung loin, kan hrûmhnawh len hmanhseh zûmtu cu hnangam in a um khomi kan si. Ka pial ta bia.

Pathian vêlngeihnak hi nifatin a dong teh! Jesuh hmanh a rat rih ṭung lo na ti bak lai a fiang.

Thawng Ṭha thei loin ni khat ah zûmlotu 4,4000 an thi. Zoh te: {https://discipleallnations. wordpress.com 2014}.

Nifatin hell kal dingin 4,4000 an thih cun nifatin an caah vêl a dihdong tinak si. Mah aw thawng nih cun Khrih salṭha tampi a hlauh hna i, Bîk Pali kaltâk in an ṭuan.

Mah 4,4000 ruangah Pathian nih a vêlngeihnak a dirter nain zûmtu thathû le daithlâng nih hell ah kan nam hna bantuk khi si. Cucaah, chungkhar mission in khi a dongh tiang, ram mui tiang vawlei um Khrihfa dihlak nih ṭuan kan i hnawt cân si.

Chungkhar mission le hnârkâ mission in kan thok awk a si.

Zûmtu hi COVID ti bantuk harnak ruangah thinphâng in um manh zong kan rak si bak lo. Bîk Pali nih a kan molh caah kan lung a vaivuan sawh bia si.

Khamh a si rih lomi caah Pathian nih vawlei a tlaih. Cu lioah mission kong ruat hleng loin vawlei hi a har tuk e, ra cang ko, Bawipa, a timi hna kan um. Cucu mah zawnruah, mah i zângfah a si tiah ka ruah.

Hrem a tuarmi nih an ti cun phundang. Na ram ca cun tuar ning an ti lehlam lai dah.

Jesuh rat hi a fial i fial le nawl phun cu a si hnga maw tiah ka ruat (hla ah a um tawn nan). A ruah in i ruahchan, zumh phun deuh si ka ti. Pa Pathian nawl a si komi ah, thlâkdawng kan si sual tawn rua tiah.

Asinain, Pathian a ṭihzah i nuncan ziaza dawh in a um i, sual a hua kho i, kan chan chia a cuanmi nih cun a ing kho lo hrim lai. Sualnak hi a ti tuk cang. Biatak hi lih nih a phenh.

COVID hi cu Pathian nih vawlei a ṭhanghnak a si tiah ka ruah. Zûmtu nih thlacam-mission kan ṭuan cân si. Zûmtu cheukhat nih COVID zeirello in an um tawn zong hi an mawh lo. An pahchih ruangah tlaihkhih le thonginn an cul tawn khi mu.

Vawlei zûmlotu mino tampi nih hin erhkhumh cân ah Pathian an kawl hmuh lai ka zumh bak.

Nain, Jesuh rat lai hmelchunh zoh cun zûmtu he zûm lotu he kan mit a caw chinchin lai.

Vawlei Pakhat, Biaknak Pakhat le Phaisa Pakhat nih lih-hnangamnak ah a kan luhpi lai. Cucu a thlâm mên si loin a muisam a lang cang.

Cucaah, atu chan zûmtu cu ralringte in kan i hnawt a hau, thinphâng loin kan i hnawt i thlarau tlau kan kawl a hau.

A makin a makmi cu lung nih duh hmanh seh kutke nih a panh kho ruam lomi hi si. Zûmtu zong nih biatak kan mertâk cân hmelchunh a si ko rua.

Atu cân chia ah ai nuam bik dingmi cu a harnak philhin mission rian a ṭuan khomi khi an si lai dah.

Malaysia COVID-19

Malaysia
667,876
Mizaw Hmuhmi
Updated on June 15, 2021 8:57 pm
Malaysia
593,695
A Dammi
Updated on June 15, 2021 8:57 pm
Malaysia
4,069
A Thimi
Updated on June 15, 2021 8:57 pm
Malaysia
70,112
Zaw Liomi
Updated on June 15, 2021 8:57 pm

Ṭial Tharmi