Asia pa US President aa cuh ve lai, US citizen paoh $1,000 peng kan pek hna lai

Asia pa US President aa cuh ve

US chuak Asia pa Andrew Yang cu Democratic party in US President aa cuh ve hnik i mipi leemnak campaign a tuah cuahmah lio asi. Democratic party in 2020 Thimnak luh aa zuammi minung 18 leng an si cang.

Andrew Yang hi Democratic party nih an thim/nominate te lai maw ti cu chim khawh a si rih lo. “2020 Election ah i cuh dingin Democratic party nih an ka thim ahcun Trump cu fawi tukin ka tei lai” a ti.

President ka ngah ahcun kum 18 cung US citizen vialte thla fatin $1000 peng free in ka pek hna lai, a ti.

“Amazon telh in Silicon Valley um companies pawl nih rian millions tampi cu minung nih ttuan hau ti lo dingin an tuah cuahmah lio a si. Tu hnu kum tlawmpal ahcun minung nih kan ttuanmi rian tampi hi robot le AI nih an ttuan dih lai i US citizens 40 million leng rian ngei loin an vai lai i tangka harsa taktak in an um lai.

“Mah ruang cun, President ka si ahcun companies pawl hi tax (VAT) ka lak hna lai i sifak mirum thleidang loin kum 18 cung American vialte thla fatin $1,000 peng (Universal Basic Income or UBI) ka pek dih hna lai,” a ti. Mah hihi mi tampi nih an uar tuk.

Atutiang ahcun a uartu an tam taktak.

Fox News nih voi 5 leng interview an tuah cang i an uar taktak. Fox News bak nih Democratic candidate uar cu zumh awk zong a har ngai, Andrew Yang hi a rak men hrim lo ti a lang.

CNN, ABC News, CBS News, CNET, Digital Trends, Fox Business, The Daily Wire le adang tampi hna zong nih interview an tuah len cang. A interview comment kip ah a uartu lawngte an si. A uar lotu hmuh awk an um theng lo.

June le July thla ah Democratic party in President cuh aa zuammi pawl bia alnak (debate) an tuah lai. I tel khawhnak caah tangka hlutu minung 60,000 ngeih a hau. Andrew Yang cu tangka hlutu 91,000 leng a ngeih cang caah debate ah aa tel kho ve lai.

Debate ahcun Barnie Sanders, Elizabath Warren le adang tampi an i tel lai. Trump nih ‘mi hrokhrawl (crooked)’ tiin a auhmi Hillary Clinton cu ai cuh ti lai lo. — an debate cu ngaih a um ngai.

New York state i Schenectady khuapi ah a rak chuakmi Andrew Yang, kum 44 cu Brown University ah BA in Economics degree le Columbia Law School in Juris Doctor degree 2 a lami si.

Company sihni a rak ttuan bal, company hme deuh pawl ah Vice President le CEO a rak ttuan bal.

2011 ah Venture for America company a dirh i CEO a ttuan, rian tampi a rak ser. 2012 ah President Obama (White House) nih “Champions of Change” laksawng a rak pek. 2015 ah “Presidential Ambassador for Global Entrepreneurship” laksawng a rak pek tthan rih.

A nulepa cu Taiwan ram in US ah a peemmi an si. Apa hi Ph.D in Physics a si i IBM research le General Electric companies ah a rak ttuan. Anu hi Master in Statistics degree a ngah vemi, cathiam chungkhar an si.

Atu cu a nupi Evelyn Yang he New York City mirum sang Manhattan ah an fapa 2 he khua an sa.

2020 Election ah Trump he i cuh dingin Democratic party’s nominee a tling kho hnga maw? A tlin ahcun, Trump a tei kho hnga maw? Comment…

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.