AA le Kawl Ralkap ral ruangah Chinmi 3,000 leng nunnak kawl in an zaam cang

AA le Kawl Ralkap ral ruangah Chinmi 3,000 leng nunnak kawl in an zaam
Hmanthlak: Khumi Media Group

Rakhine Hriamtlai (AA) le Kawl Ralkap ral karlak ah kan i taap sual lai ti phangin Paletwa peng khuate mi 750 leng Paletwa khuapi ah an zaam tthan.

“June 8 in 11 kar ah a rung phanmi lawng hi 750 leng an si, chungkhar in cun 150 an si,” tiah U Kyaw Aung, Paletwa peng zatlang zohkhenhnak bu chungttuan nih a chim.

Peing Ne Tabin auhsuh i khuate 3 in a zaammi an si, Paletwa khuapi chung ralzaam camp 3 le an chungkhat inn ah an i dor, a ti.

Ralzaam camp cu Khrihfa biakinn, NLD zung le USDP zung ah an tuahpiak hna.

An khua kam ah meithal puah thawng tampi an theih caah thinphang in an zaam.

“Harnak kan tong sual lai ti an phan caah an zaam,” tiah U Kyaw Aung nih a chim.

Chin state cozah nih facang tung 500 a pek hna, a herhmi thilri dang tete cu pumpak zong nih an bawmh hna.

Mah hlan ahhin Chinmi 2,600 leng an khua in an zaam cang. Tutan he cun 3,000 leng an si cang.

AA le Kawl Ralkap fah tukin an i kah lio February thla ah Chin state in minung 200 hrawng Bangladesh ramri ah an rak zaam. Bangladesh cozah nih a rem hna lo caah AA ukmi ramri ah atutiang an i dor peng.

Chinmi 200 leng lak ahcun AA nih hramhram in a tlaih i a kalpi mi Chinmi 50 leng an i tel, tiah Chin nuhrin covo bu pawl nih an chim.

AA nih cun, “an duh lo buin kan kalpi mi hna a si lo, a zaammi an si i kanmah nih dornak le rawl kan bawmhmi hna tu a si leh,” an ti.

AA biachimtu Khaing Thukha nih, “June 7 kha Kawl Ralkap he hnu bik kan i kah si. January thla in atutiang ah voi 100 leng kan i kap cang,” tiah a chim.

Media nih an ttialmi tete khawmhsuat tikah January in atutiang ah AA le Kawl Ralkap i kahnak, bomb i lamh sualnak, miakpi zenthong nih tlaknak in le tlaih i hrem ruangah a thimi hi a tlawmbik minung 40 paoh an si cang lai tiah zumh a si.

Inntek zatlang bu pawl nih an chim ning ah, AA le Kawl Ralkap i kah ruangah Rakhine state chaklei i Kyawktaw, Buthidaung, Minbya, Rathedaung, Mrauk-U le Ponnagyun peng ah khuami 40,000 leng nih an innlo an zaam tak cang.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.